漢字版本

最近有一个中國來的口座正規化KFC的標籤，舞的範圍有夠大，編輯變動的範圍猶閣有共臺灣包入去，予一寡QA工具攏無法度正常視覺化顯示變啥物魍，應該是 Overpass API 的限制造成的，愛手工檢查是毋是有真真正正共臺灣範圍的物件創到。伊的編輯留話的所在有特別強調無創「臺灣地區」的 KFC，我是感覺這敢有需要特別強調？

建議是講，雖然 QA 工具出問題，無法度確認是毋是有問題的編輯，雖然是弄一个國家範圍的物件，欲共舞的範圍創較細的，分幾若擺來編輯上傳，較袂引起誤解，嘛較簡單會當審核內容敢有問題。有法度閃避遮的問題，𠢕人嘛會當專心畫𪜶所在的物件，毋免予人感覺有問題愛閣開時間溝通討論。

臺灣雖然是小所在，嘛是有真濟辛辛苦苦拍拚骨力，維護圖資的圖客，足頂真依照事實，猶閣有眼前會當看著的物件來畫地圖。毋過不時有人欲來挑戰加上非事實的物件，強逼臺灣遮的人愛接受非在庄在地草地觀察會著的物仔。這个代誌是無遵守 OpenStreetMap 的現地觀察，才會當加入 OpenStreetMap 的 on the ground truth 原則。

OpenStreetMap 親像𪜶的姊妹仔計畫 Wikipedia 仝款，是人人會當看著怪怪的物件，著會使修正，甚至實際上無存在的物仔嘛會當刣掉，毋免有較懸權限的口座來做。甚至較需要了解佮操作智識的 reverter 嘛毋免一定是管理員才會當做，有社群共識一般的口座就會使做。OpenStreetMap 計畫內是較平等的，無講一定欲予較資深的人較有資格，有理就好。

Tâi-lô pán-pún

Tsuè-kūn ū tsi̍t-ê Tiong-kok lâi-ê kháu-tsō chèng-kui-hòa KFC ê piau-tshiam, bú-ê huān-uî ū-kàu-tuā, pian-tsi̍p piàn-tōng ê huān-uî ū kā Tâi-uân pau-ji̍p-khì, hōo tsi̍t-kuá QA kang-kū lóng bô-huat-tōo tsìng-siông sī-kak-huà hián-sī pìnn-siánn-mn̍gh-báng, ing-kai-sī Overpass API ê hān-tsè tsō-sîng-ê, ài tshiú-kang kiám-tsa sī-m̄-sī ū tsin-tsin-tsiànn-tsiànn kā Tâi-uân huān-uî ê mn̍gh-kiānn tshòng-kàu. I-ê pian-tsi̍p lâu-uē ê sóo-tsāi ū ti̍k-pia̍t kiông-tiāu bô-tshòng “Tâi-uân tuē-khu” ê KFC, guá sī kám-kak tsē kám-ū su-iàu ti̍k-pia̍t kiông-tiāu?

Kiàn-gī sī-kóng, sui-jiân QA kang-kū tshut-būn-tê, bô-huat-tōo khak-jīn sī-m̄-sī ū-būn-tê ê pian-tsi̍p, sui-jiân sī lōng tsi̍t-ê kok-ka huān-uî ê mn̍gh-kiānn, bueh kā bú-ê huān-uî tshòng khah-suè–ê, hun kuí-nā-pái lâi pian-tsi̍p siōng-thuân, khah-buē ín-khí gōo-kái, mā khah-kán-tan ē-tàng sím-hi̍k luē-iông kám-ū būn-tê. Ū-huat-tōo siám-phiah tsia-ê būn-tê, gâu-lâng mā ē-tàng tsuan-sim uē in sóo-tsāi ê mn̍gh-kiānn, m̄-bián hőng kám-kak ū-būn-tê ài koh khui-sî-kan koo-thong thó-lūn.

Tâi-uân sui-jiân sī sió-sóo-tsāi, mā-sī 有 tsin-tsuē sin-sin-khóo-khóo phah-piànn kut-la̍t, uî-hōo tôo-tsu ê tôo-kheh, tsiok tíng-tsin i-tsiàu sū-si̍t, iáu-koh-ū gán-tsîng ē-tàng khuànn-tio̍h ê mn̍gh-kiānn lâi uē tuē-tôo. M̄-koh put-sî ū-lâng bueh-lâi thiau-tsiàn ka-siōng hui-sū-si̍t ê mn̍gh-kiānn, kiông-pik Tâi-uân tsia-ê lâng ài tsiap-siū hui tsāi-tsng tsāi-tuē tsháu-tuē kuan-tshat ē-tio̍h ê mn̍gh-á. tsit-ê tāi-tsì sī bô tsun-siú OpenStreetMap ê hiān-tuē kuan-tshat, tsiah ē-tàng ka-ji̍p OpenStreetMap ê on the ground truth guân-tsik.

OpenStreetMap tshin-tshiūnn in-ê tsí-bē-á kè-uē Wikipedia kâng-khuánn, sī jîn-jîn ē-tàng khuànn-tio̍h kuài-kuài ê mn̍gh-kiānn, tio̍h ē-sái siu-tsìng, sīm-tsì si̍t-tsè siōng bô-tsûn-tsāi ê mn̍gh-á mā ē-tàng thâi-tiāu, m̄-bián ū khah-kuân ê kháu-tsō lâi tsuè. Sīm-tsì sī khah su-iàu liáu-kái kah tshau-tsok tì-sik ê reverter mā m̄-bián it-tīng sī kuán-lí-uân tsiah ē-tàng tsuè, ū siā-kûn kiōng-sik it-puann ê kháu-tsō tō ē-sái tsuè. OpenStreetMap kè-uē lāi sī khah pîng-tíng-ê, bô-kóng it-tīng bueh hōo khah tsu-tshim ê lâng khah-ū tsu-keh, ū-lí tō-hó.

Pe̍h-ōe-jī pán-pún

Chòe-kūn ū chi̍t-ê Tiong-kok lâi-ê kháu-chō chèng-kui-hòa KFC ê piau-chhiam, bú-ê hoān-ûi ū-kàu-tōa, pian-chi̍p piàn-tōng ê hoān-ûi ū kā Tâi-oân pau-ji̍p-khì, hō͘ chi̍t-kóa QA kang-kū lóng bô-hoat-tō͘ chèng-siông sī-kak-hòa hián-sī pìⁿ-siáⁿ-mn̍gh-báng, eng-kai-sī Overpass API ê hān-chè chō-sêng-ê, ài chhiú-kang kiám-cha sī-m̄-sī ū chin-chin-chiàⁿ-chiàⁿ kā Tâi-oân hoān-ûi ê mn̍gh-kiāⁿ chhòng-kàu. I-ê pian-chi̍p lâu-ōe ê só͘-chāi ū te̍k-pia̍t kiông-tiāu bô-chhòng “Tâi-oân tōe-khu” ê KFC, góa sī kám-kak chē kám-ū su-iàu te̍k-pia̍t kiông-tiāu?

Kiàn-gī sī-kóng, sui-jiân QA kang-kū chhut-būn-tê, bô-hoat-tō͘ khak-jīn sī-m̄-sī ū-būn-tê ê pian-chi̍p, sui-jiân sī lōng chi̍t-ê kok-ka hoān-ûi ê mn̍gh-kiāⁿ, boeh kā bú-ê hoān-ûi chhòng khah-sòe–ê, hun kúi-nā-pái lâi pian-chi̍p siōng-thoân, khah-bōe ín-khí gō͘-kái, mā khah-kán-tan ē-tàng sím-he̍k lōe-iông kám-ū būn-tê. Ū-hoat-tō͘ siám-phiah chia-ê būn-tê, gâu-lâng mā ē-tàng choan-sim ōe in só͘-chāi ê mn̍gh-kiāⁿ, m̄-bián hőng kám-kak ū-būn-tê ài koh khui-sî-kan ko͘-thong thó-lūn.

Tâi-oân sui-jiân sī sió-só͘-chāi, mā-sī 有 chin-chōe sin-sin-khó͘-khó͘ phah-piàⁿ kut-la̍t, ûi-hō͘ tô͘-chu ê tô͘-kheh, chiok téng-chin i-chiàu sū-si̍t, iáu-koh-ū gán-chêng ē-tàng khòaⁿ-tio̍h ê mn̍gh-kiāⁿ lâi ōe tōe-tô͘. M̄-koh put-sî ū-lâng boeh-lâi thiau-chiàn ka-siōng hui-sū-si̍t ê mn̍gh-kiāⁿ, kiông-pek Tâi-oân chia-ê lâng ài chiap-siū hui chāi-chng chāi-tōe chháu-tōe koan-chhat ē-tio̍h ê mn̍gh-á. chit-ê tāi-chì sī bô chun-siú OpenStreetMap ê hiān-tōe koan-chhat, chiah ē-tàng ka-ji̍p OpenStreetMap ê on the ground truth goân-chek.

OpenStreetMap chhin-chhiūⁿ in-ê chí-bē-á kè-ōe Wikipedia kâng-khóaⁿ, sī jîn-jîn ē-tàng khòaⁿ-tio̍h koài-koài ê mn̍gh-kiāⁿ, tio̍h ē-sái siu-chèng, sīm-chì si̍t-chè siōng bô-chûn-chāi ê mn̍gh-á mā ē-tàng thâi-tiāu, m̄-bián ū khah-koân ê kháu-chō lâi chòe. Sīm-chì sī khah su-iàu liáu-kái kah chhau-chok tì-sek ê reverter mā m̄-bián it-tēng sī koán-lí-oân chiah ē-tàng chòe, ū siā-kûn kiōng-sek it-poaⁿ ê kháu-chō tō ē-sái chòe. OpenStreetMap kè-ōe lāi sī khah pêng-téng-ê, bô-kóng it-tēng boeh hō͘ khah chu-chhim ê lâng khah-ū chu-keh, ū-lí tō-hó.