OpenStreetMap
最近香港遐个 OpenStreetMap 社群有出代誌，有人一直共山的名改做舊的名，閣加添聚落的名改做舊的名。有較資深的人共伊講會當添加 alt_name 抑是 old_name 嘛袂聽得。有山友看袂落去，開記者會共大眾報告，紛擾香港社群幾個月的編輯戰佮欲予使用 OpenStreetMap 的人啥款的山區內容。
欲改逐家慣勢的山名的人，用一本家己踏查結果寫的冊，毋是經過學術方式檢驗內容，嘛忽略大眾有慣勢的山名，已經叫幾若年矣。有袂少山的古早名是客家人留落來的，用的漢字較這馬香港話是無啥仝。社群的人改伊的編輯，嘛予伊改轉來，嘛毋聽別人的解說佮顧慮。香港有誠濟用 OpenStreetMap 資料的山 app，予伊按呢改變亂操操。
𪜶編輯戰進行幾個月矣，幾工前我用 Data Working Group 的身份介入，共毋聽勸的口座封鎖，毋過看來伊有足濟口座，繼續編輯伊認為正確的山名佮地號名。好佳哉香港社群的人會當及時改就轉來，猶毋過一寡 app 猶是掠舊的地圖資料，予錯誤的資料留佇頂面。
其實親像 OpenStreetMap 佮維基百科，上驚一寡堅持家己是著的人，別人改in的資料，就趕緊改轉來，嘛無法度溝通。有骨力會社群，毋過予人封鎖，伊繼續創新口座繼續編輯，無咧放棄。
台灣嘛有發生相的代誌，有一个口座叫愛台灣的，毋知佗位揣的山路GPS，共別人的路線畫佇咧 OpenStreetMap 頂懸。有真濟揣無其他來源，可能是探查的路線嘛予人畫去。
嘛有人毋管基石佮上懸所在分開標示，共基石攏總改做山峰，予袂少人誤會。幾年前 OpenStreetMap 社群有共𬦰山社群講好矣，就是基石就是基石，山峰佮基石應該獨立標示。
臺灣遮的 OpenStreetMap 的發展重點佇咧𬦰山山路的部份，佮非洲、南亞、東南亞的國家是救災目的無仝。歐美遐的國家有完整的山路開放資料，所以逐家不論是公司、社團想欲做𬦰山地圖誠容易。臺灣無商業力量想欲做𬦰山地圖，煞予 OpenStreetMap 有機會發揮。
看著香港最近的事件，仝款有𬦰山的人愛開放街圖，靠熱心貢獻者，會當畫完整的山路。
Discussion